Wednesday, December 20, 2017

RSF: JUMLA YA WAANDISHI WA HABARI 65 WAMEUAWA MWAKA 2017

media
Waandishi wa habari wakiwa kwenye moja ya harakati za kuripoti matukio kwenye eneo la Israel na Palestina
Waandishi wa habari 65 na wafanyakazi wa vyombo vya habari wameuawa katika mwaka 2017, hii ni kwa mujibu wa ripoti iliyochapishwa na shirika la wanahabari wasio na mipaka RSF.
Miongoni mwao 50 walikuwa ni maripota, hii ikiwa ni idadi ndogo zaidi katika kipindi cha miaka 14.
Hata hivyo ripoti inasema kuwa huenda kupungua kwa idadi ya vifo vya wanahabari imetokana na waandishi na ripota wengi kuacha kuripoti habari kwenye maeneo yenye vita.
Nchi ya Syria ambao kwa zaidi ya miaka 6 imeshuhudia vita vya wenywe kwa wenyewe, imesalia kuwa nchi hatari zaidi kwa waandishi wa habari kufanya kazi, imeonesha ripiti ya RSF ambayo imesema waandishi wa habari 12 waliuawa nchini humo, ikifuatiwa na Mexico ambako 11 waliuawa.
Miongoni mwa waliouawa nchini Mexico ni mwanahabari maarufu wa habari za biashara haramu ya dawa za kulevya nchini humo Javier Valdez ambaye mauaji yake yalitamausha wengi.
Waandamanaji nchini Kenya wakiwarushia mawe polisi na waandishi wa habari, waliokuwa wakiripoti maandamano ya kupinga vitendo vya rushwa, Nairobi, 3 Novemba, 2016.REUTERS/Thomas Mukoya
Mwandishi mwingine wa habari wa shirika la AFP aliuawa kwa kupigwa risasi nchini Mexico katika mji wa Kaskazini wa Sinaloa.
Nchi ya Ufilipino imekuwa ni taifa jingine hatari kwenye ukanda wa Asia kwa waandishi wa habari kufanya kazi ambapo ripiti inaonesha waandishi wa habari watano waliuawa kwa kupigwa risasi mwaka uliopita.
Ongezeko hili lilitokana na matamshi ya rais Rodrigo Duterte ambaye alisema “haimaanishi ukiwa muandishi wa habari basi ndio usiuawe ikiwa unajihusisha na biashara haramu”.
Hata hivyo hakukuwa na mwanahabari aliyeuawa mwaka uliotangulia nchini Ufilipino.
Waandishi wa habari nchini Misri wakiwa wamebeba kamera zao nje ya ofisi ya chama cha waandishi wa habari Reuters
Kiujumla ripoti ya RSF inasema kuwa idadi ya vifo vya wanataaluma wa habari imepungua kidunia katika kipindi cha miaka 14.
Katika vifo vya wanahabari 65, ripoti inaonesha kuwa wanahabari 39 waliuawa huku wengine wakipoteza maisha wakiwa kwenye majukumu yao ya kazi kama vile mashambulizi ya anga au yale ya kujitoa muhanga.
RSF inasema kuwa huenda pia vifo vimepungua kutokana na waandishi wengi wa habari kutopokea mafunzo ya kujilinda wakati wa vita.
Nchi ya Uturuki inatajwa kwenye ripoti hii kwa kuwa na magereza mengi ambayo waandishi wa habari wanashikiliwa, ambapo kwa sasa zaidi ya wanahabari 42 wanazuiliwa.
Nchi nyingine zinazofunga waandishi wa habari kwenye jela zake ni pamoja na Syria ambako kuna wanahabari 24, Iran wapo 23 na Vietnam ambako wako 19.

Monday, December 4, 2017

JESHI LA POLIS LA TANZANI NA RWANDA YAUNGANA KWA AJILI YA KUPAMBANA NA UHALIFU


Majeshi ya Polisi ya  Tanzania na Rwanda yaungana kwa ajili ya kupambana na uhalifu
Tanzania na Rwanda zimeunganisha nguvu kupitia majeshi yao ya polisi chini ya wakuu wake IGP Simon Sirro wa Tanzania na Emmanuel Gasana wa Rwanda ili kupambana na uhalifu, ujangili na kuangalia namna ya kutatua matatizo ambayo yanazikumba nchi hizo.
Akizungumza na Waandishi wa habari jijini Dar es Salaam  Emmanuel Gasana, Mkuu wa Jeshi la Polisi la Rwanda amesema kuwa, lengo ni pande mbili kushirikiana kutokana na changamoto ambazo zinatokea katika nchi mbili hizo likiwemo suala la kuongeza nguvu, teknolojia, vifaa na kuongeza uzoefu wa matumizi ya vifaa.
Mkuu wa Jeshi la Polisi nchini Tanzania IGP Simon Sirro
Kwa upande wake, Mkuu wa Jeshi la Polisi nchini Tanzania IGP Simon Sirro amesema kuwa, ushirikiano huo  unafanyika kwa kuangalia nini ambacho kinatakiwa kufanywa na maarifa ambayo yatatumiwa ili Jeshi la Polisi liweze kufanya kazi yake kwa usahihi na kupunguza uhalifu na endepo mtu akijiingiza kwenye uhalifu anaweza kupoteza familia yake na kuishia pabaya.
Mkuu wa Jeshi la Polisi nchini Tanzania IGP Simon Sirro amesema kuwa, “Wenzetu Rwanda wako mbele katika matumizi ya teknolojia, hivyo kuna baadhi ya mambo ambayo watatuelekeza na tutapata uzoefu katika kupambana na wahalifu wa mitandaoni ambao wamekuwa wakiwasumbua raia katika nchi yetu.
Emmanuel Gasana, Mkuu wa Jeshi la Polisi la Rwanda

Aidha IGP Simon Sirro ameongeza kuwa, sisi pia tuna uzoefu wa mambo mengi ambayo wenzetu Rwanda watajifunza kutoka kwetu na hivyo tunaweza kusema kuwa, kila mmoja katika ushirikiano huo anaweza kumpatia mwenzake uzoefu alionao hasa katika suala zima la kupambana na uhalifu

RAIS WA ZAMANI WA YEMEN, ALI ABDULLAH SALEH, AUAWA, WIZARA YATOA TAMKO

Rais wa zamani wa Yemen, Ali Abdullah Saleh, auawa, wizara yatoa tamko

Wizara ya Mambo ya Ndani ya Yemen imetoa tamko na kuthibitisha habari ya kuuawa rais wa zamani wa nchi hiyo, Ali Abdullah Saleh.

Leo jioni Wizara ya Mambo ya Ndani ya Yemen imesema katika tamko lake kwamba Ali Abdullah Saleh, ameuawa.

Yahya al Mahdi, mkuu wa idara ya itikadi katika jeshi la Yemen naye amethibitisha habari ya kuuawa Ali Abdullah Sale na kusema kuwa, rais huyo wa Yemen ameuawa wakati alipokuwa akikimbia kutoka mjini San'a kuelekea Ma'rib.


Rais wa zamani wa Yemen, Ali Abdullah Saleh

Amesema, vikosi vya usalama vya Yemen leo Jumatatu viligundua njia aliyokuwa anatumia Ali Abdullah Saleh kutoka eneo moja kwenda eneo jingine na walipata taarifa za kiitelijinsia za namna wafuasi wake walivyokuwa wanapanga kumtorosha San'a na kumkimbiza mafichoni Ma'rib.

Mkuu huyo wa idara ya itikadi ya jeshi la Yemen ameongeza kuwa, maafisa usalama wa nchi hiyo walianza operesheni ya kumtia mbaroni Ali Abdullah Saleh mara alipofika katika eneo la Sanhan. Hata hivyo walinzi wake hawakuwaruhusu maafisa usalama wa Yemen kumtia mbaroni na hapo ukatokea ufyatulianaji risasi baina ya pande mbili ambao umeishia kwenye kuuawa Ali Abdullah Saleh na viongozi wengine wa ngazi za juu wa chama chake. 

Habari ya kuuawa Ali Abdullah Saleh imethibitishwa pia na picha kadhaa pamoja na mkanda wa video ulioenea katika mitandao ya kijamii.


Viongozi wa zamani wa Tunisia, Yemen, Libya na Misri waliopinduliwa katika miaka ya hivi karibuni



Kuanzia siku chache zilizopita, mji mkuu wa Yemen, San'a umekuwa ukishuhudia mapigano baina ya makundi yenye silaha ya Ali Abdullah Saleh na jeshi na kamati za kujitolea za wananchi zenye mfungamano na harakati ya Answarullah.

Taarifa zinasema kuwa, fitna ya hivi sasa iliyoanzishwa na rais wa zamani wa Yemen dhidi ya harakati ya Answarullah na uhusiano wa karibu wa Ali Abdullah Saleh na Saudi Arabia ni katika njama zilizokuwa zinaendeshwa na Umoja wa Falme za Kiarabu (Imarati) za kutaka kuurudisha madarakani ukoo wa Ali Abdullah Saleh nchini Yemen.

Wednesday, November 29, 2017

VIONGOZI WA ULAYA WAKUTANA NA WENZAO WA AFRIKA ABIDJAN

Viongozi wa Umoja wa ulaya wameanza mazungumzo yao pamoja na viongozi wenzao wa bara la Afrika kuhusu uhamaji, wakipania kuupatia ufumbuzi mzozo wa watu wanaoyatia hatarini maisha yao kwa lengo la kuingia barani Ulaya.
EU-Afrika-Gipfel in Abidjan (picture-alliance/dpa/M. Kappeler)
Viongozi kutoka Ufaransa, Ubeigiji, Luxemburg, wote wakiwa ni viongozi wa kiume wenye umri unaokurubia miaka 40 wanajaribu kujitenganisha na picha ya wakoloni wa zamani wa Afrika, wakitetea umuhimu wa kuendeleza biashara na kuwekeza katika miradi ya maendeleo na usalama barani humo pamoja na kushughulikia vyanzo vya uhamaji.
Uhamaji ndio mada kuu katika mkutano huu wa kilele mjini Abidjan, mji mkuu wa kibiashara wa Côte d'Ivoire, mada iliyopata nguvu kutokana na kanda ya video iliyotangazwa hivi karibuni na kituo cha televisheni cha CNN  na kuonyesha jinsi vijana wa kiafrika walivyokuwa wakiuzwa kama watumwa katika masoko ya mnada nchini Libya. Akizungumza kuhusu kisa hicho cha karaha, kansela Angela Merkel amesema:"Mada ya uhamaji kinyume na sheria inakamata nafasi muhimu katika bara lote la Afrika wakati huu tulio nao kwasabau kuna rirpoti zinazosema vijana wa kiafrika wamekuwa wakiuzwa kama watumwa nchini Libya. Na hiyo ndio sababu mada hiyo inazusha jazba kubwa katika mkutano huu. Kwa hivyo yameibuka masilahi ya pamoja ya kukomesha uhamaji kinyume na sheria na kuwafungulia njia watu kutoka Afrika kuweza kuja Ulaya kusoma au kujifunza kazi."
Kansela Angela Merkel akizungumza na mwenyeji wakle, rais Alassane Ouattara wa Côte d'Ivoire Kansela Angela Merkel akizungumza na mwenyeji wakle, rais Alassane Ouattara wa Côte d'Ivoire
Biashara ya watumwa ni uhalifu dhidi ya ubinaadam
Kansela Merkel amesema hayo mwanzoni mwa mkutano wa kilele wa viongozi wa Umoja wa ulaya na Afrika mjini Abidjan. Jana usiku rais wa Ufaransa Emmanuel Macron aliitaja biashara ya wahamiaji wa kiafrika kuwa "uhalifu dhidi ya ubinaadam. Macron amesema anataka nchi za Ulaya na zile za Afrika ziwasaidie watu waliokamwa nchini Libya ili waweze kurejeshwa makwao. Aliahidi kufafanua zaidi kuhusu juhudi hizo katika mkutano huu wa kilele ulioanza hivi punde mjini Abidjan.
Meli ya kuwaokoa wakimbizi wa Afrika wanaoelekea Ulaya kupitia bahari ya kati Meli ya kuwaokoa wakimbizi wa Afrika wanaoelekea Ulaya kupitia bahari ya kati
 Viongozi vijana wa Ulaya wanataka kuondokana na sura ya wakoloni wa zamani
Waziri mkuu wa ubeligiji, Charles Michel amewahimiza viongozi wenzake wa Ulaya washirikiane kwa dhati zaidi na wenzao wa Afrika katika suala la uhamaji na usalama, mada ya pili muhimu itakayojadiliwa katika mkutano huu wa kilele wa siku mbili mjini Abidjan.
Tunachokitaka ni mkakati utakaoleta manufaa kwa pande zote mbili amesema Michel mwenye umri wa miaka 41. Ameongeza kusema anatoka katika kizazi kinacholiangalia bara la Afrika kama mshirika, hakuna upenu katika kizazi chetu wa kufikiria yaliyotokea zamani" amesema waziri mkuu huyo wa Ubeligiji aliyefuatana na mwenzake wa Luxemburg Xavier Bettel, wakionyesha sura tofauti na ile ya walio watangulia.

SAFARI YA PAPA FRANCIS NCHINI MYANMAR NA MATARAJI YASIYO TEKELEZEKA

Safari ya Papa Francis nchini Myanmar na matarajio yasiyotekelezeka
Jumatatu ya tarehe 27 Novemba, Papa Francis, Kiongozi wa Kanisa Katoliki Duniani aliwasili Yangon mji mkubwa kabisa wa Myanmar akianza safari ya siku nne ya kuitembelea nchi hiyo mashariki mwa Asia.
Safari ya Papa nchini Myanmar inafanyika baada ya kupita miezi mitatu tangu kuanza duru mpya ya uangamizaji kizazi cha jamii ya waliowachache ya Waislamu Warohingya. Mamia ya Wakatoliki walijitokeza kumlaki kiongozi huyo wa Kanisa Katoliki Duniani wakati alipowasili katika mji huo. Nchini Myanmar kuna Wakatoliki takribani laki saba katika jamii ya watu milioni 51 wa nchi hiyo. Wakristo hao Wakatoliki wanaishi kwa amani kamili nchini humo.
Lakini Waislamu milioni moja wa jamii ya Rohingya ambao wanapatikana katika jimbo la Rakhine la magharibi mwa Myanmar wamekuwa wakikabiliwa na ubaguzi na ukatili mkubwa pamoja na hujuma za mabudha wanaopata uungaji mkono wa serikalim katika ukatili wao dhidi ya Waislamu. Mabudha wakipata uungaji mkono wa moja kwa moja wa jeshi la Myanmar wameanzisha duru mpya ya mauaji, mateso, ubakaji wa mabinti na wanawake na kupelekea mamia ya maefu ya Waislamu hao kuwa wakimbizi.
Papa Francis, Kiongozi wa Kanisa Katoliki Duniani akiwasili Myanmar
Serikali ya Myanmar, haiwatambui Waislamu wa jamii ya Rohingya kwamba ni raia wa nchi hiyo bali inawaona kuwa ni wahajiri kutoka nchi jirani ya Bangladesh. Kabla ya kufanya safari hiyo, Askofu wa Myanmar alimtaka Papa Francis kutotumia neno Rohingya atakapokuwa safarini nchini humo, ili kuzuia kuibua hasira za viongozi wa serikali. Duru mpya ya uangamizaji kizazi cha Waislamu wa jamii ya Rohingya ilianza katika hali ambayo, jinai kama hizo hazijawahi kushuhudiwa nchini Mynamar tangu nchi hiyo ipate uhuru mwaka 1948 ambapo kabla ilikuwa ikijulikana kwa jina la Burma.
Katika kipindi cha miaka 70 iliyopita ya utawala wa Mabudha nchini humo, daima umekuwa ukitaka kukifuta kikamilifu kizazi cha jamii ya Waislamu wa Rohingya katika jimbo la Rakhine. Katika kipindi hicho Waislamu hao wameshambuliwa zaidi ya mara 20 kwa aina mbalimbali ya mashambulio. Sambamba na mashambulio hayo, kumekuweko na njama mtawalia za kuwanyima Waislamu hao haki za kiraia lengo likiwa ni kuwafuta katika ramani ya nchi hiyo. 
Papa Francis katika mazungumzo yake na Aung San Suu Kyi
Umoja wa Mataifa umetangaza katika ripoti yake kwamba, Waislamu wa Rohinga ndio jamii ya wachache ulimwenguni iliyodhulumiwa zaidi.  Tangu kuanza kwa duru mpya ya mauaji ya kizazi na utokomezaji kizazi cha jamii ya Waislamu wa Rohingya, zaidi ya Waislamu elfu moja wameuawa kikatili, makumi ya maelfu ya wanawake wamebakwa na kunajisiwa huku wengine takribani laki sita na ishirini elfu wakilazimika kuyahama makazi yao na kukimbilia katika nchi jirani ya Bangladesh. Waislamu Warohingya waliokimbilia Bangladesh nao wanakabiliwa na hali mbaya katika kambi za muda walizopatiwa kutokana na kukosa huduma muhimu za kuendeshea maisha.
Licha ya Umoja wa Mataifa na asasi za kutetea haki za binadamu kukiri bayana katika ripoti zao nyingi juu ya kutokea maafa ya kibinadamu nchini Myanmar na hali mbaya inayowakabili wakimbizi wa Kirohingya huko Bangladesh, lakini serikali ya Myanmar na hata shakhsia wake mashuhuri Aung San Suu Kyi ambaye ana Tuzo ya Amani ya Nobel wanakana kabisa juu ya kuweko muamala mbaya dhidi ya Waislamu wa nchi hiyo. 
Waislamu wa Myanmar wakiyahama makazi yao
Matamshi ya madola ya Magharibi, Kiongozi wa Kanisa Katoliki Duniani na viongozi wa Myanmar hususan Aung San Suu Kyi kuhusiana na kuhitimishwa siasa za uangamizaji kizazi dhidi ya Waislamu wa Rohingya na kuandaliwa mazingira ya kurejea wakimbizi wa jamii hiyo kutoka Bangladesh ni matarajio na utafadhalishaji. Viongozi hao badala ya kuzingatia ripoti mbalimbali za Umoja wa Mataifa na Katibu Mkuu wake kuhusiana na hali mbaya ya Waislamu Warohingya, wamekuwa wakiyapa kipaumbele matamshi ya serikali ya Myanmar.
Hivi kama badala ya Waislamu wa Rohingya, Wakristo wa nchi hiyo ndio ambao wangekuwa wanakabiliwa na siasa hizo za uangamizaji kizazi, Papa na viongozi wa madola ya Magharibi wangekuwa wanatoa matamshi kama wanayotoa hivi sasa? Je Aung San Suu Kyi angeendelea kuonekana kuwa ni fakhari kutokana na kupata Tuzo ya Amani ya Nobel? Waislamu wa jamii ya Rohingya wanauawa na wengine kulazimika kuwa wakimbizi na madola ya Magharibi yamenyamzia kimya hilo kutokana na kuwa wanaofanyiwa jinai hizo ni Waislamu na si vinginevyo.

Tuesday, November 28, 2017

UHURU KENYATTA AAPISHWA LEO NCHINI KENYA

Uhuru Kenyatta aapishwa kama rais wa Kenya
Rais Uhuru Kenyatta wa Kenya ameapishwa kuiongoza nchi hiyo kwa muhula wa pili wa miaka mitano mjini Nairobi leo katika sherehe iliyohudhuriwa na maelfu ya wafuasi wake na viongozi kadhaa wa nchi za Afrika.
Rais Kenyatta amekula kiapo katika Uwanja wa Kasarani mjini Nairobi kufuatia ushindi wake katika uchaguzi wa marudio wa Oktoba 26 ambao ulisusiwa na kinara wa upinzani Raila Odinga kwa madai kuwa haukuwa huru na wa haki. Mahakama ya Kilele Kenya ilibatilisha uchaguzi uliokuwa umefanyika Agosti nane kwa msingi kuwa kulikuwepo na dosari.
Kati ya viongozi waliohudhuria sherehe hizo ni Waziri Mkuu wa Ethiopia Hailemariam Desalegn, Marais Paul Kagame wa Rwanda, Mohamed Abdullahi Mohamed wa Somalia, Salva Kiir wa Sudan Kusini, Ian Khama wa Botswana Yoweri Museveni wa Uganda, Omar Bongo wa Gabon, Egar Lungu wa Zambia, Ismaïl Omar Guelleh wa Djibouti, na Hage Geingob wa Namibia. Tanzania imewakilishwa na Makamu wa Rais Samia Suluhu baada ya Rais John Magufuli kukosa kuhudhuria kama ilivyotarajiwa. Katika hotuba yake, Rais Kenyatta ametangaza kwamba Mwafrika yeyote atapewa viza akifika katika kiingilio chochote mpakani au viwanja vya ndege Kenya.
Rais Kenyatta baada ya kuapishwa
Aidha Kenyatta amesema ana malengo mawili katika muhula wake wa mwisho. Kwanza kuimarisha uwiano na umoja miongoni mwa Wakenya. Ameongeza kuwa ameanza kuwasiliana na viongozi wote na kueleza nia yake ya kuendeleza umoja. Halikadhalika amesema lengo la pili ni kuhakikisha huduma ya afya inawafikia Wakenya 100%. Naibu wa Rais William Ruto pia ameapishwa katika sherehe hiyo.
Katika upande mwingine polisi mjini Nairobi waliliazimka kutumia gesi ya kutoa machozi kuwatawanya wafuasi wa Raila Odinga waliokuwa wanakutana katika uwanja wa Jacaranda katika mtaa wa Embakasi walikokuwa wamekusanyika  kuwaomboleza waliouawa katika ghasia za baada ya uchaguzi.

Sunday, November 19, 2017

KUSAMBARATISHWA KIKAMILIFU DAESH (ISIS) NCHINI IRSQ

Kusambaratishwa kikamilifu DAESH (ISIS) nchini Iraq
Mabadiliko yanayojiri kwenye medani za vita nchini Iraq yanabainisha kusambaratishwa na kutokomezwa Daesh (ISIS) nchini humo; na kushindwa kikamilifu kundi hilo la kigaidi na kitakfiri ambako ni sawa na kupata mafanikio makubwa Wairaqi katika mapambano dhidi ya magaidi kumeakisiwa sana na duru mbalimbali za habari.
Vikosi vya jeshi la Iraq siku ya Ijumaa viliukomboa mji wa Rawah kutoka kwenye makucha ya magaidi wa Daesh. Kufuatia kukombolewa mji huo kulikochukua muda wa saa kadhaa tu, Waziri wa Mambo ya Ndani wa Iraq Qasim Al-Araji alitangaza kuwa kundi la kigaidi na ukufurishaji la Daesh limesha sambaratishwa kikamilifu nchini humo. Rawah ilikuwa miongoni mwa ngome za mwisho za Daesh ndani ya ardhi ya Iraq. Hivi sasa magaidi wa kundi hilo la ukufurishaji hawana mji mwengine wowote muhimu wa Iraq wanaoushikilia na kuukalia kwa mabavu isipokuwa wanaishia kuzunguka zunguka na kuranda randa kwenye maeneo ya mbali na katika baadhi ya vijiji.
Waziri wa Mambo ya Ndani wa Iraq, Qassim Al-Araji
Mnamo mwaka 2014, kwa uungaji mkono wa kifedha na kijeshi wa Marekani na waitifaki wake wa Magharibi na wa Kiarabu ikiwemo Saudi Arabia, kundi la kigaidi na kitakfiri la Daesh liliishambulia Iraq, likayavamia na kuyakalia kwa mabavu baadhi ya maeneo ya kaskazini na magharibi mwa nchi hiyo. Lakini tangu wakati huo hadi sasa, jeshi la Iraq lilkisaidiwa na vikosi vya kujitolea vya wananchi limeweza kuyakomboa maeneo hayo kutoka kwenye makucha ya kundi hilo; na kimsingi kundi hilo limeshasambaratishwa kikamilifu nchini humo.
Wapiganaji wa jeshi la kujitolea la wananchi la Al Hashdu-Sha'abi
Hata hivyo baada ya kushindwa kijeshi kundi la kigaidi na ukufurishaji la Daesh, suali la kujiuliza hivi sasa ni je, kwa ushindi huo, Wairaqi sasa wataweza kupumua na kupata salama ya kuepukana na shari ya ugaidi? Au kundi hilo la kigaidi na kitakfiri litaanzisha mbinu nyengine mpya na kuendelea kuwaandamana wananchi wa Iraq kwa hujuma na jinai zake za kinyama? Kwa kuzingatia kuwa mashambulio ya kigaidi yalishadidi hivi karibuni katika nchi za Iraq na Syria, tunaweza kusema kuwa baada ya kushindwa kijeshi na kupoteza maeneo waliyokuwa wakiyashikilia kwa mabavu, magaidi wa kundi la kitakfiri la Daesh wameshaainisha mkakati wanaokusudia kuutekeleza mnamo siku zijazo. Ili kufifisha kushindwa kwake kijeshi, kundi la Daesh (ISIS) limeanzisha mbinu na mkakati wa kuvuruga usalama, kwa kushadidisha mashambulio ya kujitoa mhanga ya miripuko ya mabomu pamoja na mauaji ili kuvuruga amani na uthabiti nchini Iraq, sambamba na kupanua wigo wa harakati zake katika nchi nyengine ikiwemo Afghanistan, Libya na kwengineko. Harakati za aina hiyo ni muendelezo wa njia na misimamo ya kufurutu mpaka iliyoanzishwa mwaka 2004 na Abu Mus'ab Az-Zarqawi kwa njia ya kuanzisha mauaji na kuwalenga raia; na baada ya kushadidi hitilafu baina ya Wairaqi ikaandaa mazingira ya kuzaliwa Daesh kutoka kwenye tumbo la Al-Qaeda na kupelekea hatimaye mwaka 2014 kushambuliwa na kukaliwa kwa mabavu kirahisi miji mbalimbali ya ardhi ya Iraq.
Magaidi wa kundi la ukufurishaji la Daesh
Leo hii baada ya miaka mitatu ya vita na mapigano makali ya kujitolea mhanga, yaliyowagharimu roho nyingi za watu na kuwasababishia pia uharibifu mkubwa, Wairaqi wameweza kuyakomboa maeneo yote ya ardhi yao yaliyokuwa yamevamiwa na kushikiliwa kwa mabavu na Daesh; hata hivyo ushindi huo wa kijeshi dhidi ya magaidi wenye misimamo ya kufurutu mpaka sio mwisho wa mapambano, bali inapasa ifanyike kazi ya kuing'oa na kuitokomeza mizizi ya misimamo hiyo hatari. Katika hali kama hiyo, inavyoonekana, baada ya kulisambaratisha kijeshi kikamilifu kundi la Daesh nchini Iraq, vita na mapambano yajayo yatakuwa ni ya kitaarifa na kiintelijinsia ambayo hayatotegemea askari na vifaru pekee; bali yatategemea zaidi unasaji wa taarifa za kiintelijinsia. Katika mazingira ya sasa ambapo magaidi wa kundi la kitakfiri la Daesh wamesha sambaratishwa kikamilifu nchini Iraq, Marekani, ambayo inahisi njama na mipango yake iliyokuwa imepanga dhidi ya Iraq na eneo kwa jumla imevurugika, hivi sasa inashughulika kupanga njama na mikakati mingine mipya ya kiadui. 
Mji wa Rawah uliokuwa ngome ya mwisho muhimu ya Daesh nchini Iraq
Ukweli ni kwamba kundi la kigaidi na ukufurishaji la Daesh limeshafutwa kwenye ramani ya Iraq, na hilo limewezekana kwa baraka na nafasi ya uongozi wa juu wa kidini na kwa kujitolea mhanga vikosi vya Iraq hususan vya jeshi la kujitolea la wananchi la Al Hashdu-Sha'abi. Na hii ni katika hali ambayo jeshi hilo la wananchi lingali linaendelea kuandamwa na njama na tuhuma za Marekani. Kutokana na matukio yaliyojiri huko Iraq wananchi wanapaswa kuwa macho zaidi katika kipindi kinachoanza hivi sasa cha baada ya kusambaratishwa Daesh nchini humo.../

WAFUNGWA WA KISIASA BAHRAIN WAZUILIWA KUWA NA MAWASILIANO YOYOTE NA NJE YA JELA

Wafungwa wa kisiasa Bahrain wazuiliwa kuwa na mawasiliano yoyote na nje ya jela
Duru zenye uhusiano na familia ya Katibu Mkuu wa Jumuiya ya Kitaifa ya al-Wifaq nchini Bahrain, zimeeleza kuwa utawala wa Aal-Khalifa umemwekea vizuizi vikubwa Sheikkh Ali Salman na shakhsia wengine mashuhuri wanaoshikiliwa katika jela za nchi hiyo.
Kwa mujibu wa habari hiyo, Sheikh Ali Salman na shakhsia wengine wakubwa wanaoshikiliwa katikka jela za Bahrain wamezuiliwa kufanya mawasiliano na watu wa familia zao, kupiga simu au hata kusoma magazeti. Katika kuendelea kutolewa hukumu za kidhalimu za utawala wa Aal-Khalifa dhidi ya Sheikh Ali Salman anayeendelea kutumikia kifungo cha miaka tisa jela, utawala huo umewasilisha mahakamani mashitaka mapya dhidi ya shakhsia huyo ya kile kinachotajwa kuwa eti ni kufanya ujasusi kwa maslahi ya Qatar.
Shakh Ali Salman, Katibu Mkuu wa Jumuiya ya Kitaifa ya al-Wifaq nchini Bahrain
Katika uwanja huo, mwendesha mashtaka wa Manama amewasilisha mashtaka hayo dhidi ya Sheikh Ali Salman, Hassan Sultwan na Ali al-Usud, ambao nao pia ni wanachama wa Jumuiya ya Kitaifa ya al-Wifaq kwa tuhuma hizo hizo za kufanya ujasusi kwa ajili ya Qatar kwa lengo la kile alichokisema kuwa eti ni kutaka kuiondoa madarakani serikali ya Bahrain. Kwa mujibu wa taarifa hiyo, hukumu dhidi ya shakhsia hao itatolewa tarehe 27 Novemba mwaka huu.
Maandamano ya Wabahrain
Sheikh Ali Salman alikamatwa mwaka 2014 na utawala wa kidikteta wa Aal-Khalifa na kuhukumiwa kifungo cha miaka minne jela mwaka 2015 kwa tuhuma za uchochezi na kuivunjia heshima Wizara ya Mambo ya Ndani ya nchi hiyo. Hata hivyo mahakama ya rufaa ya nchi hiyo na katika njama za kutaka kumfunga miaka mingi zaidi shakhsia huyo ilimbadilishia mashitaka na kuyafanya ya tuhuma za kutaka kubadilisha utawala na hivyo ikamuhukumu kifungo cha miaka tisa jela.

Saturday, November 18, 2017

VELAYATI AMUONYA RAIS WA UFARANSA ASIINGILIE MAMBO YA IRAN

Velayati amuonya Rais wa Ufaransa asiingilie mambo ya Iran
Mshauri wa Kiongozi Muadhamu wa Mapinduzi ya Kiislamu katika masuala ya kimataifa amemuonya Rais Emmanuel Macron wa Ufaransa asiingilie masuala ya ndani ya Iran kwani kujiingiza katika masuala yasiyomuhusu hakuna faida kwa nchi yake.
Ali Akbar Velayati amesema hayo leo wakati alipohojiwa na shirika la habari la IRIB na sambamba na kumlaumu Rais Emmanuel Macron wa Ufaransa kwa kuingilia masuala ya ulinzi ya Iran amesema, kitendo cha Paris cha kujiingiza katika suala la makombora ambalo ni la kiistratijia kwa Iran hakina matunda yoyote isipokuwa kuzidi kujipotezea heshima Ufaransa mbele ya Jamhuri ya Kiislamu.
Mshauri huyo wa Kiongozi Muadhamu wa Mapinduzi ya Kiislamu katika masuala ya kimataifa amesisitiza kuwa, Iran haiombi idhini ya mtu yeyote katika masuala yake ya kiulinzi na kusema wazi kwamba, kama Ufaransa inataka kuwa na uhusiano mzuri na Iran basi inapaswa iache kujiingiza katika masuala yake ya ndani kwani ni kinyume na maslahi ya kitaifa ya Ufaransa.
Rais Emmanuel Macron wa Ufaransa

Amesisitiza kuwa, bila ya shaka yoyote majibu ya Iran kuhusu mwito wa Ufaransa juu ya mradi wake wa makombora ni hapana na hakuna hata uwezekano wa asilimia moja wa kukubaliana na jambo hilo.
Jana Ijumaa, Rais wa Ufaransa alidai eti kuna haja kwa Iran kuweka wazi stratijia zake za mradi wa makombora ya balestiki na kudai kuwa Iran inapaswa kuachana na siasa zake alizoziita eti ni za mashambulizi.
Mshauri wa Kiongozi Muadhamu wa Mapinduzi ya Kiislamu ya Iran katika masuala ya kimataifa amemjibu rais huyo wa Ufaransa na kumuonya asiingilie masuala ya ndani ya Iran kwani kila nchi ina haki ya kujilinda na kwamba nchi yoyote ile haina haki ya kuipangia itumie stratijia gani katika kuimarisha nguvu zake za ulinzi. 

Friday, November 17, 2017

UMASIKINI UNACHOCHEA MIMBA ZA UTOTONI TANZANIA

Utafiti: Umasikini unachochea mimba za utotoni Tanzania
Imeelezwa kuwa, umasikini na kipato cha chini cha baadhi ya familia nchini Tanzania ndicho chanzo cha mimba za utotoni katika jamii ya nchi hiyo ya Afrika Mashariki.
Hayo yameelezwa na Mkurugenzi Mtendaji wa Taasisi ya Jukwaa la Utu wa Mtoto (CDF), Koshuma Mtengeti katika warsha ya siku moja ya kutambulisha mradi na shirika hilo kwa wadau iliyofanyika mkoani Dodoma. Kwa mujibu wa shirika hilo, utafiti uliofanywa na shirika hilo kwa kusaidiana na mashirika mengine, umebaini kwamba, umasikini wa familia husababisha familia zenye maisha magumu kupambana kwa bidii kutafuta chakula na mavazi ya watoto wao.
Mkurugenzi Mtendaji wa Taasisi ya Jukwaa la Utu wa Mtoto ameeleza kuwa, utafiti wa Demografia ya Afya Tanzania wa 2016 (TDHS) unaonesha kwamba, asilimia 36 ya wasichana wa umri wa kati ya miaka 20-24 waliolewa kabla ya kufikia miaka 18. 
Maandamano ya kupinga ndoa za utotoni nchini Nigeria
Hayo yanajiri katika hali ambayo, kumekuweko na kampeni ya kimataifa ya kukabiliana na ndoa za utotoni hasa barani Afrika.
Mwezi uliopita nchi ya Senegal ilikuwa mwenyeji wa mkutano uliokuwa na lengo la kuongeza hatua za kutokomeza ndoa za utotoni katika nchi za Afrika Magharibi na Kati. Inaelezwa kuwa, wazazi ambao hali zao ni duni kimaisha, mara nyingi huwaozesha watoto wao mapema ili kupunguza mzigo wa ulezi, wakati huo huo, baadhi ya mila na desturi zinatajwa kuwa nazo zina mchango katika hilo.

Thursday, November 16, 2017

WAMAREKANI WAZIDI KUPIGANA RISASI KIHOLELA, MAKUMI WAUAWA NA KUJERUHIWA

Wamarekani wazidi kupigana risasi kiholela, makumi wauawa na kujeruhiwa
Watu 16 wameuawa na wengine 24 kujeruhiwa katika matukio 56 ya kupigana risasi kiholela yaliyotokea katika kipindi cha masaa 24 kwenye maeneo tofauti ya Marekani.
Kituo cha kutoa takwimu za mashambulizi ya silaha nchini Marekani kimetangaza habari hiyo na kuongeza kuwa mauaji na mashambulizi hayo yametokea katika kipindi cha masaa 24 yaliyopoita katika majimbo ya Florida, Michigan, Texas, Ohio na Pennsylvania. 
Kwa mujibu wa kituo hicho cha Marekani, katika kipindi cha masaa 48 yaliyopita, kumeripotia matukio 164 ya kupigana risasi kiholela katika kona mbalimbali za Marekani ambayo yamepelekea watu 45 kuuawa na wengine 88 kujeruhiwa.
Umilikaji silaha ovyo, mgogoro mkubwa kwa Marekani

Takwimu zinaonesha kuwa, jamii ya Marekani ndiyo yenye silaha nyingi zaidi zinazomilikiwa na watu majumbani kuliko jamii nyingine yoyote duniani kiasi kwamba kati ya kila watu 100, 90 kati yao wana silaha nyepesi majumbani mwao.
Takwimu zinaonesha pia kuwa makundi ya utengenezaji silaha yana nguvu sana nchini Marekani na ndiyo yanayodhibiti vyama vya Democrats na Republican, hivyo serikali yoyote inayoingia madarakani haina nguvu ya kupiga marufuku umilikaji silaha ovyo nchini Marekani.

TAHARUKI ZIMBABWE, MUGABE ANG'ANG'ANIA MADARAKA, AU NA UN ZATOA KAULI

Taharuki Zimbabwe, Mugabe ang'ang'ania madaraka, AU na UN zatoa kauli
Rais Robert Mugabe wa Zimbabwe ambaye yuko katika ncha ya kuuzuliwa amekataa kuachia madaraka akisisitiza kuwa yeye ndiye kiongozi halali wa nchi hiyo.
Duru za habari zimeliambia shirika la habari la Reuters kuwa, Mugabe amekataa upatanishi wa Askofu wa Kanisa Katoliki nchini humo Fidelis Mukonori, ambaye alikuwa anaongoza mazungumzo kati ya rais huyo mkongwe mwenye umri wa miaka 93 na makamanda wa jeshi la nchi hiyo.
Jeshi hilo jana lilitangaza kuwa Mugabe na familia yake wako kwenye kizuizi cha nyumbani na kuongeza kuwa litawapandisha kizimbani wale liliowataja kama "wahalifu" waliomzunguka kiongozi huyo ambao wameisababishia nchi hiyo madhara na hasara za kiuchumi na kijamii.
Makamu wa Rais wa Zimbabwe aliyefutwa kazi na kukimbilia uhamishoni
Wakati huo huo, Antonio Guterres, Katibu Mkuu wa Umoja wa Mataifa kupitia msemaji wake, Farhan Haq amezitaka pande zote husika kujizuia kuchua hatua inayoweza kuvuruga mambo zaidi, na kusisitiza kuwa mgogoro uliopo unaweza kupatiwa ufumbuzi kwa njia za kisiasa na mazungumzo.
Naye Mkuu wa Umoja wa Afrika, Alpha Conde ambaye pia ni Rais wa Guinea amesema AU inalaani vikali hatua ya majenerali wa jeshi la Zimbabwe kutwaa madaraka kwa nguvu na kusisitiza kwamba mfumo wa katiba unapaswa kuheshimiwa na pande zote.
Huku hayo yakiarifiwa, Morgan Tsvangirai, kinara wa upinzani nchini Zimbabwe amerejea nchini akitokea Afrika Kusini, kufuatia kile kinachotajwa kuwa mapinduzi ya kijeshi yasiyo ya umwagikaji wa damu.
Morgan Tsvangirai
Kwa mujibu wa gazeti la NewsDay la Zimbabwe, Tsvangirai ametangaza kuwa yuko tayari kufanya mazungumzo na Emmerson Mnangagwa, Makamu wa Rais wa Zimbabwe aliyepigwa kalamu nyekundu na Mugabe hivi karibuni, kuhusu uundwaji wa serikali ya mpito.

Monday, October 30, 2017

WATU 5 WAUAWA KATIKA MAANDAMANO DHIDI YA SERIKALI MJINI GOMA, KONGO DR

Watu 5 wauawa katika maandamano dhidi ya serikali katika mji wa Goma, Kongo DR
Maandamano ya wananchi ya kupinga serikali yaliyozusha makabiliano baina yao na polisi jana Jumatatu katika wilaya za Madjengon na Mabanga katika mji wa Goma mkoani Kivu ya Kaskazini nchini Jamhuri ya Kidemokrasia ya Kongo yamesababisha vifo vya watu watano.
Maandamano hayo ambayo yalijiri jana jioni yaliitishwa na makundi ya wanaharakati wa kupigania demokrasia na mengineyo kama sehemu ya mgomo mkubwa unaoshinikiza kuondoka madarakani Rais Joseph Kabila na kudhihirisha hasira za wananchi kwa kushindwa kuendeshwa uchaguzi wa rais huko Kongo ili kumchagua rais mpya. Waandamanaji walichoma moto matairi ya gari na hivyo kusababisha msongamano wa magari katika barabara za mji wa Goma. Maandamano mengine kama hayo yanatazamiwa kufanywa siku chache zijazo.
Rais Joseph Kabila wa Jamhuri ya Kidemokrasia ya Kongo 
Mgogoro wa kisiasa Kongo DR umesababishwa na hatua ya Rais Joseph Kabila wa nchi hiyo kukataa kuachia madaraka baada ya muhula wake kumalizika mwezi Disemba mwaka jana. Uchaguzi mkuu ulipangwa kufanyika nchini humo kabla ya kumalizika mwaka huu chini ya makubaliano yaliyofikiwa kati ya serikali ya Kinshasa na mrengo wa upinzani. Hata hivyo imeelezwa kuwa kushindwa kutekelezwa hatua hiyo si jambo la kushangaza kwa kuzingatia kuwa Tume ya Uchaguzi ya Kongo mwezi Julai mwaka huu ilitangaza kuwa kuna uwezekano uchaguzi huo usifanyike mwaka huu kutokana na kuwepo matatizo ya bajeti na kuendelea machafuko nchini humo.

UHURU KENYATA ATANGAZWA RASMI MSHINDI WA UCHAGUZI WA RAIS KENYA ULIOSUSIWA NA MPINZANI WAKE

Uhuru Kenyatta atangazwa rasmi mshindi wa uchaguzi wa rais Kenya uliosusiwa na mpinzani wake
Mwenyekiti wa Tume Huru ya Uchaguzi na Mipaka ya Kenya IEBC Wafula Chebukati amemtangaza Uhuru Kenyatta, mgombea urais kwa tiketi ya chama cha Jubilee Rais mteule na mgombea wake mwenza William Ruto kuwa Naibu Rais mteule baada ya kupata ushindi wa kishindo katika uchaguzi wa marudio wa rais uliofanyika siku ya Alkhamisi.
Akitangaza matokeo hayo jioni ya leo, Chebukati alisema uchaguzi huo ulikuwa huru, halali na wa haki.
Kwa mujibu wa matokeo yaliyotangazwa na mwenyekiti huyo wa IEBC, Kenyatta amejinyakulia kura 7,483,895 ambazo ni sawa na asilimia 98.27 ya kura zote halali zilizopigwa katika uchaguzi huo wa rais ambao ulisusiwa na mpinzani wake mkuu Raila Odinga.
Mwenyekiti wa IEBC, Wafula Chebukati
Zoezi la kutangaza matokeo limefanyika bila kujumuisha majimbo 25 ya mkoa wa Nyanza ambayo yalishindwa kupiga kura siku ya Alkhamisi kutokana na fujo na machafuko yaliyokwamisha upigaji kura katika majimbo hayo.
Chebukati amesisitiza kuwa masharti yaliyokuwa yamewekwa na Mahakama ya Juu iliyofuta matokeo ya uchaguzi wa rais wa Agosti 8 kwa ajili ya uchaguzi wa marudio yametekelezwa, hivyo uchaguzi huo ni halali, huru na wa haki.
Aidha amesema uchaguzi wa marudio wa rais umeendeshwa na timu mpya iliyojumuisha wafanyakazi wa IEBC kutoka kila pembe ya nchi. Ameongeza kuwa hali katika majimbo 25 ya mkoa wa Nyanza ilisababisha uchaguzi ushindwe kufanyika katika maeneo hayo.
Akizungumza mapema leo, Naibu Mwenyekiti wa IEBC Consolata Nkatha alisema kura za maeneo ambayo uchaguzi haukufanyika hazitoathiri matokeo rasmi ya uchaguzi huo.
Raila Odinga
Mgombea urais kwa tiketi ya muungano wa upinzani wa NASA Raila Odinga alisusia uchaguzi wa marudio akitaka pamoja na mambo mengine kutimuliwa maafisa waandamizi wa tume ya uchaguzi na kubadilishwa wachapishaji wa karatasi za kupigia kura na watayarishaji wa teknolojia itakayotumika katika mchakato wa uchaguzi huo.
Hayo yanajiri huku Wakenya wakisubiri kwa hisia tofauti msimamo wa kiongozi huyo wa upinzani ambao ameahidi kuutangaza baada ya rais Kenyatta kutangazwa rasmi mshindi wa uchaguzi wa marudio.../

Saturday, October 28, 2017

WAFUNGWA ZAIDI YA ELFU MOJA WA JELA YA TORA MISRI WAANZA MGOMO WA KULA

Wafungwa zaidi ya elfu moja wa jela ya Tora Misri waanza mgomo wa kula
Wafungwa wa jela yenye ulinzi mkali ya Tora mjini Cairo Misri wameanza mgomo wa kula chakula wakipinga mazingira mabaya yanatotawala jela hiyo.
Zaidi ya wafungwa elfu moja wa jela hiyo maarufu kwa jina la Jela la Nge wamenza mgomo wa kula wakilalamikia kunyimwa haki zao za kimsingi ikiwa ni pamoja na kuzuiwa jamaa zao kuwatembelea, kunyimwa huduma za afya na kadhalika.
Wakili Usama Biyumi anayeshughulikia kesi za wafungwa kadhaa wa jela hiyo amesema kuwa, ukatili wa idara ya jela hiyo dhidi ya wafungwa unaongezeka siku baada ya siku licha ya matakwa ya kukomeshwa mienendo hiyo.
Anesema kuwa maafisa wa jela hiyo wamekuwa wakizuia kuingizwa chakula kwa wafungwa na kupewa vyakula visivyokuwa salama.
Familia za wafungwa mbele ya jela ya Tora, Cairo
Biyumi ameongeza kuwa, mgomo huo ulianzishwa siku kadhaa zilizopita na baadhi ya wafungwa, na wafungwa wengine wa jela hiyo wamejiunga na wenzao hao baada ya matakwa yao kukataliwa na idara ya jela hiyo.
Wafungwa wa jela hiyo wananyimwa haki za kimsingi na manyanyaso yanashadidi zaidi kwa wafungwa wa kisiasa ambao wanashikiliwa katika seli zenye giza totoro na wanazuiwa kuzungumza na wenzao.
Misri imekuwa ikikosolewa na mashirika ya kimataifa ya kutetea haki za binadamu kutoka na ukatili na manyanyaso yanayofanywa dhidi ya wafungwa katika jela za nchi hiyo. 

MAGHALA YA NYUKLIA YA MAREKANI; CHANZO CHA UKOSEFU WA AMANI DUNIANI

Maghala ya nyuklia ya Marekani; chanzo cha ukosefu wa amani duniani
Makamu wa Rais wa Marekani ameyataja maghala ya silaha za nyuklia za nchi hiyo kuwa suala linalopelekea kuwepo amani duniani.
Akiwa ziarani kukitembelea kituo cha jeshi la anga cha Minot, Mike Pence Makamu wa Rais wa Marekani amesema hakuna nguvu duniani inayopelekea kuwepo amani sawa na maghala ya silaha za nyuklia za Marekani. 
Mike Pence, Makamu wa Rais wa Marekani 
Matamshi hayo yametolewa katika hali ambayo Marekani inatambulika ulimwenguni kama nchi pekee inayotumia silaha za nyuklia vitani. Miaka 70 iliyopita Wamarekani waliishambulia kwa mabomu ya nyuklia miji miwili ya Hiroshima na Nagasaki huko Japan na kusababisha vifo vya  raia wa nchi hiyo zaidi ya laki tatu baada ya kupitia mateso na masaibu chungu nzima. Kabla ya wakati huo, hakukuwa na silaha yoyote ya kivita iliyotengenezwa na binadamu iliyosababisha mauaji ya kutisha kama hayo. Mashambulizi hayo ya nyuklia yalizua hofu kubwa duniani kwa kadiri kwamba kwa mara ya kwanza katika historia, mwanadamu alikumbwa na wasiwasi wa kuangamizwa dunia nzima. 
Sehemu ya mji wa Hiroshima ulivyosambaratishwa na mashambulizi ya nyuklia ya Marekani 
Miaka minne tu baada ya Marekani kufanya mashambulio hayo ya nyuklia huko Japan, Umoja wa Kisovieti ulilifanyia jaribio bomu lake la kwanza la nyuklia na ni baada ya hapo ndipo kukaanza zama za ushindani wa silaha za nyuklia duniani. Ushindani huo mkubwa uliendelea na kuzifanya nchi mbili za Marekani na Urusi ya zamani mwezi Oktoba mwaka 1962 kukaribia kupigana vita vya nyuklia. Wakati huo kama Urusi ya zamani isingezirejesha karibu na Cuba meli zake zilizokuwa zimebeba makombora ya nyuklia, labda Rais wa wakati huo wa Marekani John F. Kennedy  angeamuru kupiganwa vita vya nyuklia; vita ambavyo katika masaa yake ya awali vingeweza kuua kwa uchache watu milioni 400. Marekani pekee hivi sasa imerundika katika maghala yake ya silaha, silaha za nyuklia ambazo zina uwezo wa kuiharibu dunia mara kadhaa. Hata kama Marekani katika miaka 70 iliyopita haijatumia silaha za aina hiyo, lakini imehusika kwa njia ya moja kwa moja au isiyo ya moja kwa moja katika kuenea kwa silaha hizo hatari. Dunia sasa inahofia makabiliano ya kinyuklia kati ya Marekani na Korea ya Kaskazini ambayo yanaweza kusababisha maafa makubwa kati ya pande mbili. 
Hasa ikitiliwa maanani kuwa amani ya dunia anayoikusudia Pence haitokani na uadilifu na ridhaa ya jamii, bali inatokana hofu ya Marekani kutekeleza mashambulizi ya nyuklia dhidi ya nchi nyingine. Kuwepo hofu na wasiwasi wa kusambaratika kikamilifu madola makubwa duniani miaka 70 baada ya kumalizika Vita vya Pili vya Dunia kumezuia kuibuka migogoro kati ya madola hayo. Wakati huohuo nchi zilizokuwa zikimiliki nguvu za nyuklia kama Marekani zilihamisha uhasama na mashindano yao ya kijeshi kutoka ndani ya ardhi za nchi hizo na kuyahamishia katika maeneo yaliyobaki nyuma kimaendeleo na yale yaliyokuwa yakistawi huko Asia, Afrika na Amerika ya Latini. Watu wa maeneo hayo walipoteza maisha na kugharimika pakubwa kufuatia vita hivyo baina ya madola makuu duniani. Kwa ibara nyingine ni kuwa, amani iliyoipata Marekani kwa silaha zake za nyuklia na waitifaki wake wa Ulaya haijakuwa na natija nyingine ghairi ya kusababisha vita na umwagaji damu katika maeneo mengine ya dunia

HALI YA KIBINADAMU YEMEN INASHTUA, SAUDIA YAENDELEZA HUJUMA

Hali ya kibinadamu Yemen inashtua, Saudia yaendeleza hujuma
Mkuu wa misaada ya kibinadamu katika Umoja wa Mataifa amesema hali ya kibinadamu nchini Yemen ni ya kushtua huku Saudi Arabia ikiendeleza hujuma dhidi ya nchi hiyo.
Akizungumza na waandishi wa habari katika mji mkuu wa Yemen, Sana'a, Mark Lowcock ambaye Jumamosi ya leo amemaliza safari ya siku tano nchini Yemen amesema kuwa, njia pekaa ya kumaliza vita Yemen ni kupitia mchakato wa kisiasa.
Lowcock amesema hali ya kibinadamu inazidi kuzorota huku ugonjwa wa kipindupindu ukienea kwa kasi ambayo haijawahi kushuhudiwa duniani. Amesema Yemen inakabiliwa na ukosefu mkubwa zaidi wa chakula duniani na kwamba idadi kubwa ya watu wamelazimika kuwa wakimbizi.
Watoto ni waathirika wa hujuma ya Saudia nchini Yemen
Vita vamizi vya Saudia na waitifaki wake dhidi ya Yemen vilianzishwa mwezi Machi mwaka 2015 kwa kisingizio cha kutaka kumrejesha madarakani rais wa nchi hiyo aliyejiuzulu na kuitoroka nchi Abd Rabbuh Mansur Hadi. Vita hivyo vingali vinaendelea kwa mwaka wa tatu sasa bila ya utawala wa Aal Saud na waitifaki wake kufikia malengo haramu waliyokusudia. Watu zaidi ya 13,000 , wengi wakiwa ni wanawake na watoto, wameuawa katika hujuma ya Saudia nchini Yemen.

UHURU KENYATTA AONGOZA KWA 96%, ODINGA ATAKA UCHAGUZI MPYA NDANI YA SIKU 90

Uhuru Kenyatta aongoza kwa 96%, Odinga ataka uchaguzi mpya ndani ya siku 90
Rais Uhuru Kenyatta anaongoza kwa asilimia 96 katika matokeo ya awali ya uchaguzi wa marudio wa urais uliofanyika Alkhamisi iliyopita nchini Kenya.
Matokeo ya awali ya Tume Huru ya Uchaguzi na Mipaka ya Kenya (IEBC) yanaonyesha kuwa Uhuru Kenyatta anaendelea kuongoza kwa kura zaidi ya milioni 7.
Wagombea wengine wanaomfuata kwa pamoja wamepata chini ya asilimia 5 ya kura zilizohesabiwa kufikia sasa.
Wananchi wa Kenya Alkhamisi walielekea kwenye masanduku ya kupigia kura katika uchaguzi wa marudio wa urais kufuatia kutenguliwa ule wa awali uliofanyika Agosti 8 mwaka huu.
Jana Ijumaa, Raila Odinga, kinara wa muungano wa NASA ambao umebadilishwa jina na sasa litafahamika kama Vuguvugu la Mageuzi NRM alisema kujitokeza idadi ndogo ya watu katika uchaguzi huo ni ishara tosha kuwa kulikuwa na uchakachuaji katika uchaguzi wa Agosti 8, huku akisisitiza kuwa lazima uchaguzi mwingine ufanyike ndani ya siku 90.
Raila Odinga
Mahakama ya Juu ya Kenya ilitengua matokeo ya uchaguzi huo wa rais kwa hoja kwamba IEBC ilifanya baadhi ya makosa katika mchakato wa uchaguzi. Muungano wa upinzani (Nasa) umewahimiza wafuasi wake kutoshiriki uchaguzi huo baada ya kiongozi wa muungano huo Raila Odinga kujiondoa katika kinyang'anyiro hicho.  
Katika hatua nyingine, IEBC imetangaza kuakhirisha tena zoezi la upigaji kura lililotazamiwa hii leo, katika kaunti nne za Kisumu, Migori, Homa Bay na Siaya, ambazo ni ngome za NASA, ambazo siku ya Alhamisi wakazi wake hawakupiga kura kwa sababu za kiusalama.